منتديات الشيماء

منتديات الشيماء


قصيدة دين أبوهم إسمه إيـه // للشاعر جمال بخيت

شاطر
avatar
الشيماء
المديره العام
المديره العام

رقم العضويه : 2 عدد المساهمات : 323
تاريخ التسجيل : 14/05/2009

الملف الشخصى
تنسيق الملف الشخصى: 10

حصرى قصيدة دين أبوهم إسمه إيـه // للشاعر جمال بخيت

مُساهمة من طرف الشيماء في السبت أكتوبر 25, 2014 2:20 pm

:: قصيدة دين أبوهم إسمه إيـه // للشاعر جمال بخيت ::

دين أبونا يا مسلمين
في يقيني
أعز دين
كلمة النور الأمين
كلمة الحق المبين
حكمة يكتبها الإله
فوق جبين الطيبين
دين أبونا يا محمد
انت سره
ومبتداه
انت إحساسه ومداه
دقة عارفينها في قلوبنا
لما نخشع للإله
لما نطلب يوم رضاه
لما نركع
لما نسجد
لما نفرح بالحياة

دين أبونا إبراهيم
رش جمر النار حنين
ع الخرايط والأماكن
اتولدنا طوافين
ذاكرين

دين أبويا لو مسيحي
رحمة لاجل العالمين
نصرة لاجل المظلومين
كلمة الحب اللي بايس
الصليب جوه الكنايس
ندهة الأجراس لمريم
والآمان للمجدلية
رحمة ليكوا
ورحمة ليا
المسيح شايل آلامنا
لاجل يهدينا السلامة
خد أيمن
خد أيسر
العبادة مهيش كلام
عيش بإسم الإنسانية
وانسى نية
تدفعك للإنتقام

دين أبويا دين إلهي
أينما كان اتجاهي
حتى لو كان دين يهودي
احنا مش ضد اليهود
موسى في القرآن وليد
يحضنه نيل الخلود
بين إيديه
تسعى عصاته
حيه
وجدودنا شهود
سحرة آمنوا برب موسى
انقسم له بحر عاتي والجبل عرف السجود
رجعت الحية عصاية
حضنت التوراة وصايا
إوعى تقتل
إوعى تسرق
إوعى تزني
إوعى تقبل بالخضوع
بحر خير الكون يواتي
لما نفرد له القلوع
والجحيم ياكل سنينكم
لو فقير فيكم يجوع
الوصايا هي هي
أرتضيها زي ما هي
في ضميري وفوق شفاهي

دين أبويا دين إلهي
أينما كان اتجاهي
حتى لو كان مش إلهي
المجوسي يترعب من النار ويعبد
الإله اللي فـِ خياله
ليه حرامه وليه حلاله
تسمعه فـِ معبد دعاء
تلهمه رعشة رجاء
للبقر ناس يعبدوه
ويدينوله بالولاء
مش غباء
تعرفوا في البقرة إيه بيقدسوه ؟
العطاء

دين أبويا
أي دين
فيه عصاه أو مخطئين
بس فـِ نهاية المطاف
فيه ملايكه ومؤمنين
ولرضا للصالحين
والهنا للصابرين
فيه مالاذ للعابدين الشاكرين
المشتاقين رغم الضياع
لليقين

دين أبويا
أي دين

اللي انا بقى معرفوش
الوحوش
الكروش
اللي لو طالوا رقابينا
بينهشوا مبيرحموش
دين أبوهم إسمه إيه ؟
اللي داسوا فوق رؤوسنا بالبيادة
اللي مشيوا بالببلاد للبلادة
اللي فتاويهم فساد للعقل
يقضي على العبادة
اللي مسحوا من الآيات معنى الشهادة
دين أبوهم اسمه إيه؟

لوثوا الدم فـِ عروقنا
سدوا عين الشمس فوقنا
سرقوا ضوئنا
صادروا نيلنا
ودفـّعونا تمن وضوئنا
دين أبوهم اسمه إيه؟
اللي باع وطن بحاله
خضرته وصفرة رماله
نسوته وشهوة رجاله
بهجته ودمه وعياله
خطوته وسنين نضاله
ثورته ضد احتلاله
دين أبوهم اسمه إيه؟

مين إلهه ؟
مين رسوله ؟
فين كتابه ؟
فيه ملايكه وللا غابوا ؟
فيه شياطين وللا تابوا ؟
لما شافوا التابعين
شرهم زاد عن جهنم شر لا يمكن حسابه
دين أبوهم اسمه إيه؟

حتى فرعون اللي صَدَق
انه من نسل الإله
واللي قال إنه الإله
كان بيبني الأهرامات للممات قبل الحياة
كان له بعث ويوم حساب
كان له دولة
حضور
إدارة
كان منارة ترشد الكون للحضارة
كان له جيش فارض وجوده
كان محارب بين جنود
واما يتجاوز حدوده
كان له رب يغرقه وينقذ يهوده

حتى فرعون اللي صَدَق
انه من نسل الإله
واللي قال انه الإله
كان له كهنة في العلوم
يقروا فـِ كتاب الكواكب
يرصدوا سير النجوم
يفتحوا له سكك بيبان
في سراديب الزمان
ويقولولو ازاي يدوم
حنطوه
خلدوه
بالمعاني والمباني والرسوم
كانوا كهنة مؤمنين
خلوا كلمة مصر دين
حاضرة في العهد القديم
حاضرة في العهد الجديد
حاضرة في القرآن حضور
الآيات فيها تدور
مفردة عز وجلال
معلنة وبين السطور
تخترع
ثانية وشهور
تخترع شعر وبحور
حتى فلاحها الفصيح
شكوته بتشع نور

إيه يا مصر
إيه يا أرض الطبيبين
اللي حكموا في الزمان ده يبقوا مين ؟
دين أبوهم اسمه إيه؟
حد يعرف فيكوا دين
كل أتباعه لصوص أو قوادين ؟
في المعاصي مولودين
في الكراسي مأبدين
في التفاهة معدودين
في السفاهة مفرودين
ع البلاهة مسنودين
للشراهة مجندين
ع القرف متعودين
ع الشرف متمردين
ع الوطن متنمردين
بالخيانة موحدين
اللي يعرف دين كده يقوللي عليه
دين أبوهم اسمه إيه ؟



************************************



آه وألف آه





ياجدع على





الدنيا





لما تاخد





ماتدى





آه وألف آه





لما تدى





يوم بسمه





وتاخدها





أيام وليالى





وندور مانلاقى





غير الدمعه





آه وألف آه








avatar
شهد
عضو متالق
عضو متالق

رقم العضويه : 5 عدد المساهمات : 48
تاريخ التسجيل : 15/05/2009

الملف الشخصى
تنسيق الملف الشخصى: 20

حصرى رد: قصيدة دين أبوهم إسمه إيـه // للشاعر جمال بخيت

مُساهمة من طرف شهد في الإثنين أكتوبر 27, 2014 11:44 am

قصيده رائعه لشاعر رائع


    الوقت/التاريخ الآن هو الإثنين سبتمبر 25, 2017 10:06 am